Plantun de Prouvènço

Pèr coumpara dos planto d'encò nostre

Helictotrichon setaceum & Typha domingensis

Helictotrichon setaceum

Poaceae Graminaceae

Nom en français : Avoine soyeuse.

Descripcioun :
Civado renadivo que trachis dins li tepiero roucaiouso e lis esboudèu de mountagno. Si fueio soun envertouiado e estrecho (Ø < 1 mm), sedouso e pelouso sus lou dessubre. Fai de mato espesso à la baso (fotò - emé de pousso esterlo "intravaginalo"). De nouta peréu que soubron pu que li fourrèu dis anciàni fueio (fotò).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 50(70) cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Helictotrichon
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : 400 à 2200 m
Aparado : Noun

Liò : Esboudèu - Tepiero roucaiouso - Mountagno mejano
Estànci : Mountagnard à Subaupen
Couroulougi : Ouroufito-Aupenco-Sud-Ouèst
Ref. sc. : Helictotrichon setaceum (Vill.) Henrard, 1940 (= Avena setacea Vill., 1787 )

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.